01 June 2020, Cagayan de Oro City - Ang mga BNS kon Barangay Nutrition Scholars sa probinsya sa Misamis Oriental makadawat ug dugang kantidad sa ilang honoraria sugod 1st Quarter sa tuig 2020.
Mikabat sa ₱1,683,000.00 ang gitunol ni Gov. Bambi Emano alang sa 561 ka BNS pinaagi ni Provincial Health Office-Nutrition Division head Ms. Marites A. Gomez atol sa sinemanang pagpakayab sa nasudnong bandila via Zoom app niadtong Martes, Mayo 26.
Makadawat ang matag BNS sa tag-₱3,000.00 alang sa bulan sa Enero padulong Marso, kantidad nga karon lang misaka sa pagpungko ni Gov. Emano. Gikan sa tinuig nga ₱9,000.00 sa milabay nga 20 na ka tuig, nahimo kining ₱12,000.00 matag tuig sa kasamtangang administrasyon ni Gov. Emano.
Si Ms. Puribel B. Talaroc, ang presidente sa BNS Federation sa Misamis Oriental, nagkanayon nga daku na’g ikatabang ang nasangpit nga kantidad sa ilang inadlaw-adlaw nga panikaysikay, hilabina ning panahon sa krisis nga hatud sa hulga sa coronavirus disease 2019.
Nagsugod kaniadtong Mayo 27 ang pagpanghatag sa honoraria sa tanang mga BNS, kon diin inubanan kini sa pag-apod-apod sa vegetable seeds gikan sa Provincial Agriculture Office para sa mga BNSs. (Misamis Oriental Provincial Information Office/NNC X)
