1 Oktubre 2020, (Maxie Cadavez/LGU Manolo Fortich) - Ang sentro sa atong Pang Gobyerno mao ang Tawo, nay pandemya o wala, nay COVID-19 o wala, ang tawo pa gihapon mao ang ugat hinungdan sa atong pagpangalagad. Mao kini ang baruganan ni Mayor Quiño nga iyang gipadayag sa mga Ulo sa Departamento ug mga kawani sa Munisipyo ning bag-o taliwala sa nagkataas nga kaso sa COVID-19.
Tungod niini gimanduan ni Mayor Quiño si Ms. Christy Marie Alsado, ang pangulo sa Municipal Nutrition Action Office nga atimanon ug maayo ang pagkaon sa mga frontliners lakip ang mga pasyente sa Municipal Isolation Unit.
“Dili mutalikod ang atong liderato ngadto sa tanang mga biktima, duyog sa atong kawsa ang Sanguniang Bayan ug ang tibuok pwersa sa Lungsod kinahanglan lang atong atimanon ang mga biktima sa COVID-19,” matud ni Mayor Quiño. Tungod niini prioridad karon sa buhatan ni Ms. Alsado ang pagpreparar sa pagkaon sa mga Frontliners ug mga pasyente sa MIU gikan sa pamahaw, paniudto ug panihapon. Gibanabana nga moabot sa siento singkwenta mil pesos (₱150,000.00) ngadto sa diosientos mil pesos (₱200,000.00) matag semana ang mga magasto sa pagkaon. Mao kini ang gipadayan ni MNAO Alsado dihang mahinabi sa “BARUG Manolo Fortich” live radio program 25 Septyembre 2020.
Matud ni Alsado nga sugod niadtong 23 Marso 2020 ang buhatan sa MNAO maoy gitahasan sa pag andam sa food provisions sa MIU nga nahimutang sa Manolo Fortich Central Elementary School ug karon sa Municipal Gym matag adlaw bisan holiday. “Garantisado nga lamian ug sustansyado ang mga pagkaon nga among giserve sa mga hingtungdan tungod kay ang MNAO nagsunod sa Memorandum nga gipatuman sa National Nutrition Council,” matud ni Alsado. Gidugang niini nga kada adlaw adunay kausaban sa menu nga ilang pagasundon sulod sa duha ka semana sama sa gulay, isda, karne, beef sinabaw o fried sa ingon makadugang kini kusog kanila sa padayong pakig-gubat sa COVID-19.
“Walay laktaw, walay putol matag adlaw ang atong pagatiman sa mga pasyente ug frontliners sa MIU, mudagan na ug unom (6) ka bulan sugod sa pagbuto sa COVID-19,” dugang pamahayag ni Alsado.
Kasamtangan mo average na sa sais sientos (600) ka packed lunch matag adlaw ang ginapreparar nga pagkaon sa MNAO tungod sa kanunay nga pagsaka sa gidaghanon sa mga pasyente nga masulod sa MIU. Taliwala sa kakuyaw sa COVID-19 ang MNAO kanunay nga gasunod sa striktong health protocols nga gipatuman aron makalikay sa virus. Tungod niini dili direktang makasulod ang mga tawo nga buot mosulod sa ilang buhatan bisan gani ang mg crew nga mukuha sa pagkaon nga dad-on sa MIU. Striktong gipatuman usab ang health protocols ngadto sa kitchen staff nga musulod-gawas sa MNAO. Arong sigurong mabatunan ang maayong panglawas, gihatagan sila ug duha (2) ka adlaw nga pahulay o rest day sa matag semana aron kanunay kondisyon ang ilang kaugalingon ug luwas sa sakit.
