By Bing Pabiona, Nutri-Media Circle President

Iloilo City, September 18, 2021 – Nagpanagtag sang mga personal protective equipment (PPEs) pareho sang face masks, alcohol, kag face shields, ang National Nutrition Council (NNC) 6 sa mga Barangay Nutrition Scholar (BNS) sa nanuhaytuhay nga munisipalidad sa Kabisay-an Nakatungdan.

Ang BNS mga community volunteers nga naga hatag serbisyo may kaangtanan sa nutrisyon kag ikaayong lawas sa pumuluyo nga may malnourished nga kabataan nga nagaedad apat ka tuig panaog kag ang nagapasuso nga kababainhan kag ang senior citizens.

Naga bisita sila sa mga balay kag nagahatag ‘nutrition counseling’ sa mga iloy kon paano mangin ‘healthy’ ang ila kabataan.

Sa karon nga may pandemya dala sang COVID-19, ang BNS naga-deliver sang nutrisyon kag nutrition-related services sa ila mga barangay kag nagaserbe bilang ‘frontline responders’ para sa mga pasyente nga may COVID-19.

Bilang katapo sang Barangay Health and Emergency Response Team (BHERT) nagahatag sila bulig paagi sa pagpatrolya sa checkpoints, nagapanagtag Vitamin A capsules sa mga nanay kag kabataan nagaedad apat ka tuig panaog, Ready-to-Use Therapeutic and Supplementary Foods (RUTF/ RUSF) para sa 'wasted' kag 'severely wasted preschool children, food packs, kag nagabulig sa paghiwat sang contact tracing.

Magluwas sa PPEs, kada tuig nagahatag man ang NNC sang bulig pinansyal pareho sang traveling allowance, medical kag survivorship sa BNS nga ginakabig nga moderno nga baganihan.