Cebu City - Ang temtasyon sa sige og kaon kanunay nga naa nato. Mao ni nga dili ta angay ma guilty nga mocrave ta og mga pagkaon ug dili dapat nato silotan ang atong kaugalingon kung naa tai gustong pagkaon.

Aron ma pugngan nato ang dili maayong eating habits, atong hinumduman kanunay ang MoVaBa o ang Moderation, Variety, ug Balance. Mahimo nato kan-on ang tanan natong gusto basta disiplinahon nato ang atong kaugalingon nga mu kaon lang sa igo nga gidaghanon base sa atong panginahanglan para sa sunod nga tingkaon. Mokaon ta og lain-laing mga pagkaon nga dili sad sobra o gamay ra sa bisan unsa ug klase sa pagkaon. Nagpasabot usab kini sa pagkunhod sa gidaghanon sa dugang nga asukar ug trans-fat sa atong mga pagkaon.

Sa mga pagkaon nga atong gipangkaon kada adlaw, iapil ang mga utanon, prutas, pan, mga produkto sa dairy, karne, manok, isda, uban pang protina nga pagkaon, ug mga whole grains products. Kung adunay mga pagkaon nga wala nato gustohi, ayaw kini likayi sa tibuok nimong kinabuhi, kundi, pangita og laing mga paagi sa pag-andam niini para mas madawat ni nimo inig sunod tingkaon.

Sa laing bahin, siguroa nga ang portion sizes o gidag-on o gidaghanon sa pagkaon igo lang (moderate) ug makataronganon. Ipadayon ang saktong oras o regular nga skedyol sa pagpangaon. Kung gigutom na, dali ra nga malaktawan ang pagkaon labi na kung busy na kaayo ta. Inig abot na sa panahon na dili na kaya sa tiyan ang kagutom, matintal na ug malimtan ang maayong nutrisyon. Mao nga importante nga dili mo laktaw (skip) sa pagkaon kay ang tendensiya mas daghan na noon ang makaon. Ang pagkaon og snack sa tunga-tunga sa mga meals, makatabang sa pagpugong sa kagutom, apan ayaw lang daghana og kaon og snacks kay modugang na sa total nga kalorya nga angay ra unta para sa tibuok adlaw. To be continued… – ND II Mary Carmeli C. Garrovillo, RND