Cebu City – Isip panapos niini nga serye, ania ang mga ginagmayng lakang nga atong mahimo sa hinay-hinay nga pag-ilis sa saktong batasan sa pagkaon aron makatabang sa paghimo og malungtarong rutina para sa himsog nga kinabuhi. Ang kanunay nga pagpauswag sa atong mga batasan sa pagkaon nanginahanglan og usa ka mahunahunaon nga pamaagi diin atong gipamalandongan, pulihan ug palig-onon.

Una, Pagmalandong. Atong pamalandongan ang tanan natong mga batasan sa pagkaon, maayo man o dili ug susihon ang kasagarang mga hinungdan sa atong daotan na batasan sa pagkaon. Paghimo og lista sa maayo ug dili maayo nga batasan sa pagkaon ug pangutan-a ang kaugalingon ngano ug unsa ang gibati sa matag higayon nga mamatngonan ang kaugalingon nga nagbuhat niini nga mga dili maayong Batasan sa pagkaon.

Duha, Pulihan. Pulihan ang mga dili maayong batasan sa pagkaon sa mga mas maayu nga pamatasan. Pananglitan, mu kaon nga mas hinay pinaagi ug sa pag-usap sa pagkaon sa hustong paagi, mokaon lang kon gigutom na ug sakto nga pagplano sa klase ug gidaghanon sa mga pagkaon sayo pa ang oras.

Ug sa katapusan, Palig-onon. Paligon ang bag-o ug mas himsog nga batasan. Ang bag-ong kinaiya (new habits) dili dali ma kat-onan. Dili kini dali mahitabo o mahitabo sa usa ka gabii lamang. Kung atong namatngonan ang atong kaugalingon nga naghimo na sa dili maayo nga pamatasan, hunonga kini dayon kutob sa atong mahimo ug pangutan-a ang kaugalingon: Ngano nga gibuhat ko kini? Kanus-a ko nagsugod sa pagbuhat niini? Unsa nga mga pagbag-o ang angay nga buhaton?

Pag-amping nga dili sawayon ang kaugalingon o maghunahuna nga ang usa ka sayup "makadaot" sa imong tibuok adlaw nga maka apekto sa kalidad sa himsog nga mga batasan.

Ang panaw sa pagpamenos sa timbang dili sayon. Pinaagi sa pagkamakanunayon ug paglahutay nga lihok mahimong makab-ot kini nga tumong. Ang sinugdanan sa usa ka libo ka lakang nga panaw nagsugod sa usa lang ka lakang. Good luck nato tanan, mga ka-nutrisyon! – ND II Mary Carmeli C. Garrovillo, RND