Cebu City - Ang mga Barangay Nutrition Scholars (BNS) maoy esensyal nga personalidad para sa nutrisyon sa komunidad ug ang nagsilbeng “link” sa gobyerno ug pribadong sektor alang sa pagpalambo sa mga programa alang sa nutrisyon. Ang Presidential Decree No. 1569 nagmando sa pagdeploy og labing menos usa ka BNS sa matag barangay sa nasud aron mamonitor ang “nutritional status” sa mga bata ug mag coordinate sa programang pang nutrisyon sa barangay. Sama sa barangay health workers, ang mga BNS makita usab sa komunidad ug andam moalagad sa serbisyong pang nutrisyon.
Ang pagkonsumo og usa ka himsog ug balanse nga pagkaon usa sa mga daghang depinisyon sa pulong nga Nutrisyon. Ang mga pagkaon ug ilimnon naghatag og kusog ug sustansya sa atong lawas nga gikinahanglan kay aron insakto nga mabuhat niini ang iyang nagka lain-laing niyang gimbuhaton. Dili makab-ot ang saktong nutrisyon kung ang mga ginikanan o mga tig-atiman sa bata ug pamilya walay kasayuran sa saktong sustansya. Dili usab makab-ot ang saktong nutrisyon kung walay serbisyong pang-nutrisyon nga madawat ang katawhan. Muresulta kini sa pagka-malnourish o kakuwangan o pagsobra sa pagkaon nga gikinahanglan sa lawas.
Sumala sa nalatid sa Presidential Decree No. 1569 o Nutrition Act of the Philippines, ang kadako sa problema sa malnutrisyon nagkinahanglan sa hinanali ug mas dako nga involvement ug partisipasyon sa katawhan. Pinaagi sa maong balaod namugna ang National Nutrition Council isip “policy making and coordinating body for nutrition’ sa nasud.
Sa duha ka-tuig nga nilabay, nakasinati ta og “global health crisis” mahitungod sa pandemya sa COVID-19 ug miresulta kini og grabeng epekto sa kumunidad sama sa pagkawala sa trabaho nga mibunga kini sa pagkaubos sa kapasidad sa katawhan nga mupalit sa necessities nga iyang gikinahanglan. Tungod niini, nidaghan ang mga pamilya nga gutom ug wala makakuha sa saktong sustanya. Ubay-ubay sab ang nakuwangan sa pagkaon tungod kay lisod ang pagpanarbaho ug walay ikapalit og pagkaon. Apan sa duha ka tuig wala kita mawad-i og paglaom tungod kay ang atong mga BNS anaa kanunay nga nag hatag og serbisyong pang-nutrisyon inubanan sa ubang miembro sa Barangay Nutrition Committee. Kanunay sila nga nag hatag og mga impormasyon ngadto sa katawhan sa mga pamaagi aron makakuha og saktong nutrisyon, naghatag og diriktang serbisyo ug nakiglambigit sa ubang “service providers’on mahatag ang gikinahanglang serbisyong pang nutrisyon sa komunidad.
Karun sa pagpadayon sa atong kinabuhi ug ingon man sa daghan nga mga kausaban sa estilo sa kinabuhi, kita makanunayon ta nga mu-adopt ug mas mopalig-on pa sa atong mga kaugalingon aron pag atubang sa “new-normal”. Kita, kanunay nga magtinabangay aron mamenos ug mahunong ang problemang malnutrisyon sa atong komunidad. Ug ang mga BNS, ang atong mga Nutritioin Frontliners ang atong katambayayong alang sa pag sagubang niini nga “challenge”. // DMO II Gabe Henriel P. Sucalit, RND
