Carmen, Cebu - Ang Municipal Nutrition Committee sa Carmen mipasiugda ug mipalig-on pa sa lain-laing mga programa aron mabatukan ang malnutrisyon sa ilang lungsod. Ilang gihingosgan ang pag padayong sa Barangay First 1000 Days (BF1KD) program, monthly immunization, prenatal check-up, nutrition counseling, home visit, child growth monitoring, dietary supplementation program, nutrition education, advocacy, ug pagpang-apod-apod og iron folic acid sa mga buntis. Gihatagan sab nilag gibug-aton ang pagbansay sa mga barangay nutrition scholars ug barangay health workers aron mapasaka ang kahanas ug kahibalo niini ug magtinabangay sa pagpasiugda sa himsog nga komunidad. Giduyogan usab sila sa mga non-government organization sama sa Rise and Rebuild Foundation nga ilang katambayayong sa dietary supplementation program para sa mga mabdos ug gagmay’ng bata 6-23 months old.

Ang malnutrisyon usa ka kondisyon sa lawas nga dala sa kakulangan, sobra, o dili balanse nga nutrisyon. Adunay lain-laing mga porma sa malnutrisyon sa nasud: kulang ug sobra sa timbang ug kakulangan sa micronutrient. Ang underweight, stunting, wasting sakop sa undernutrition. Samtang ang sobra sa timbang ug katambok nahisakop sa sobra nga nutrisyon. Ang VADD, IDD, IDA sa laing bahin nahisakop sa micronutrient deficiency.

Kahinumduman nga ang Carmen anaa sa ika-6 nga puwesto sa mga lungsod sa probinsya sa Sugbu ang daghan og bata nga kulang sa timbang (underweight) ug mitala kini og 408 ka bata edad 0-59 ka bulan. 819 ka mga bata sa samang pangidaron ang potot (stunted) ug 141 ka bata ang niwang kayo (wasted). Samtang aduna say 176 ka mga bata ang sobra ka tambok o overweight. 

Gipanghinaot sa Municipal ug mga Barangay Nutrition Committee sa lungsod nga mapamenos ang problemang malnutrition sa Carmen, ug nag-awhag sab sila sa mga ginikanan ug mga bata nga mo apil sa mga nagkalain-laing programa gihimo sa lungsod para nila. // ND II Geraldine Mae S. Pausanos, RND