Canlaon City – Nagpahigayon ang City Nutrition Committee (CNC) sa Canlaon City, Negros Oriental og Maternal Infant and Young Child Nutrition training sa ilang mga Barangay Nutrition Scholars (BNSs) ug mga myembro sa women’s organization. Ang pagbansay gihimo niadtong 11-14 sa Oktubre tuig 2022 didto sa Poblacion, Canlaon City. Ang maong kalihokan gitambongan sa ilang baynte singko (25) ka mga BNSs ug dose (12) ka miyembro sa ilang women’s organization.

Usa sa mga nag-unang rason nganong nakahukom ang dakbayan sa Canlaon nga magpahigayon og pagbansay mao ang pagsangkap sa ilang mga BNS sa saktong kahibalo ug kahanas nga gikinahanglan aron mas maayo nilang mapatuman ang ilang gimbuhaton. Tungod sa mga epekto nga gidala sa pandemya sa COVID-19 sa komunidad, kini nga pagbansay nahimong usa ka kinahanglanon tungod kay ang pagkawalay kasiguruhan sa pagkaon nakaapekto sa kadaghanang mga pamilya sa komunidad.

Ang maong pagbansay gipasiugdahan ni Canlaon CNPC Rodney Zamora. Giabagan sab siya nila ni Nutritionist-Dietitian II Teresito M. Caayaman III sa DOH-CVCHD, Negros Oriental DNPCs Antonieta Delfino ug Kayla Anne D. Calumpong.

Kini nga kalihukan nagtumong sa pagpasiugda sa bag-ong mga pagtulon-an sa mga gawi sa pagpakaon sa mga inahan, pamilya, ug mga tig-atiman ug ipakaylap pa ang dugang kahibalo bahin sa maayong pamatasan nga may kalabotan sa nutrisyon. Importante usab nga ang matag BNS adunay saktong pagsabot sa unang 1000 ka adlaw sa bata nga giila ngaa “golden window of opportunity" aron malikayan ang malnutrisyon ug growth retardation ug mahimong advocate niini nga pagtulun-an. // ND II Teresito M. Caayaman III, RND