Carmen, Cebu – Lahi ang papel sa Barangay Nutrition Scholar (BNS) ug Barangay Health Worker (BHW) sa katilingban. Pareho silang frontline worker sa komunidad. Nagtinabangay sila sa pagserbisyo sa mga tawo sa barangay.

Ang BNS kay usa ka barangay-based volunteer worker nga responsable sa paghatag og nutrition services ug uban pang mga serbisyo sama sa family planning, environmental sanitation, backyard gardening, ug supplemental feeding. Siya naghatag og serbisyo sa nutrisyon nga walay bayad. Kinahanglan niya nga ipadayon ang pag-update sa iyang pagkat-on aron mahatag ug mahimo ang iyang mga tahas sa komunidad isip trabahante sa nutrisyon.

Ang legal nga basehan sa BNS Program mao ang Presidential Decree 1569. “Pagpalig-on sa Barangay Nutrition Program pinaagi sa pagbutang og Barangay Nutrition Scholar sa matag barangay, paghatag og pundo, ug para sa uban pang katuyoan”. Kini gipirmahan ni Kanhi Presidente Ferdinand Marcos Sr. niadtong Hunyo 11, 1978. Kini ipatuman sa mga local nga pangagamhanan pinaagi sa local nutrition committee nga gipangulohan sa local chief executive.

Ang BHW sa pikas bahin, usa ka tawo nga nakaagi og pagbansay gikan sa gobyerno ug NGO nga boluntaryong naghatag og serbisyong kahimsog sa komunidad. Sila mohatag og nag-unang pag-atiman sa panglawas sa komunidad. Nagtanyag sila og first aid, maternal, neonatal, ug child health services, ingon man community-based initiatives sama sa barangay immunization. Sa Pilipinas dili molapas sa 1% sa kinatibuk-ang populasyon and BHWs. Ang mga BHW kinahanglang mokompleto og pasiuna nga kurso sa pagbansay sa dili pa sila mopatuman sa ilang gimbutaton. Ang Republic Act 7883 mao ang Barangay Health Workers’ Benefits and Incentives Act of 1995 nga usa ka balaod nga naghatag og benepisyo ug insentibo sa mga gi accredit nga BHWs alang sa boluntaryong serbisyo sa panglawas nga gihatag sa komunidad (source DOH).

Ang mga tahas ug gimbuhaton sa BHW ug BNS managlahi sa usag usa. Nagpatuman ang BNS sa mga mga kalihokan nga naglangkob sa planning, coordination, advocacy, implementation, monitoring and evaluation, resource mobilization ug documentation kalabot sa nutrisyon ubos sa direksyon sa Municipal Nutrition Program Coordinator. Bisan unsa nga kalihokan nga naglambigit sa nutrisyon, ang BNS ang nanguna sa paghatag sa mga serbisyo. Sa laing bahin, ang BHW naghatag og batakang preventive, promotive, ug curative services ubos sa superbisyon sa mga midwife. Ang pagtrabaho sa barangay ug pagserbisyo sa katawhan dili sayon ​​nga trabaho. Busa, ang mga buluhaton ug responsibilidad sa BHW ug BNS kinahanglan nga magkomplemento sa usag usa. // ND II Geraldine Mae S. Pausanos, RND