Carmen, Cebu - Ang isda usa ka low-fat nga taas nga kalidad nga protina. Ang isda puno sa omega-3 fatty acids ug bitamina sama sa D ug B2 (riboflavin). Kini sila abunda usab sa calcium ug phosphorus ug maayong tinubdan sa mga mineral, sama sa iron, zinc, iodine, magnesium, ug potassium. Ang American Heart Association nagrekomendar sa pagkaon og isda labing menos duha ka beses kada semana isip kabahin sa himsog nga pagkaon. Ang isda puno sa protina, bitamina, ug sustansya nga makapaubos sa presyon sa dugo ug makatabang sa pagpakunhod sa risgo sa atake sa kasingkasing o stroke. 

Ang pagkaon og isda makahatag og himsog na panglawas ug pangutok. Ang pagkaon og isda usa ka importante nga tinubdan sa omega-3 fatty acids. Kining importante nga mga sustansya makapahimsog sa kasingkasing ug utok. Duha ka omega-3 fatty acids nga makita sa isda mao ang EPA (eicosapentaenoic acid) ug DHA (docosahexaenoic acid). Ang atong mga lawas dili makagama og omega-3 fatty acids busa kinahanglan nato kining makuha gikan sa pagkaon. Ang omega-3 fatty acids makita sa tanang matang sa isda, apan daghan kini sa mga tambokon nga klase sama sa salmon, trout, sardinas, herring, canned mackerel, canned light tuna, ug oysters.

Ang omega-3 fatty acids makatabang sab sa pagmentina og usa ka himsog nga kasingkasing pinaagi sa pagcontrol sa abnormal nga ritmo sa kasingkasing, pagpaubos sa presyon sa dugo ug pagpakunhod sa risgo sa kalit nga kamatayon, atake sa kasingkasing, ug stroke. Makatabang sab kini sa himsog nga paglihok sa utok ug pagpalambo sa panan-aw ug “nervous system” sa bata sa panahon sa pagmabdos. Mahimong makunhuran ang risgo sa depresyon, ADHD, Alzheimer's disease, dementia, ug diabetes. Mahimong mapugngan ang paghubag ug makunhuran ang risgo sa arthritis pinaagi sa pagkonsumo og pagkaon nga taas og omega 3 fatty acid.

Ang pagkaon sa isda sa mga mabdos ug nagpasuso nga mga inahan makapasa niini nga sustansya ngadto sa ilang bata nga gisabak. Ang isda maoy talagsaong tinubdan sa taas nga kalidad nga protina. Dugang pa, kini adunay daghang mga benepisyo, lakip na ang pagpanalipod sa panan-aw ug pagpauswag sa kahimsog sa pangisip sa pagkatigulang. Gawas niana, ang isda sayon nga andamon, ug dali kini nimong madugang sa imong pagkaon. // ND II Geraldine Mae S. Pausanos, RND