Cebu City – Ang kapistahan ug Sinulog Festival maoy tinuig nga relihiyoso ug kultural nga selebrasyon sa Sugbo alang kang Senyor Santo Niño. Ang selebrasyon giisip nga mao ang una sa labing inila nga kasaulogan sa nasud. Kini nagdani og kapin-milyon nga mga bisita gikan sa nagkalain-laing lugar sa tibook kalibotan matag tuig.

Tungod kay aduna nay kausaban sa mga giya ug health protocols ug ni relaks na usab ang mga restrictions sa pandemya, dili gayud malikayan nga mas daghan ang motambong ug mosalmot niining dakong kasaulogan.

Ang mga sumasalmot dili luwas sa init sa adlaw, ug kauhaw. Kini poseble nga mobunga og dehydration ug maghatag og negatibong epekto ug kadelikadohan sa panglawas sa tawo. Ang dehydration mahitabo kung mawad-an ka og daghang tubig ug likido sa lawas. Kini kasagarang mahitabo kung naa ka sa mga lugar nga init kaayo. Ang mga indibidwal nga adunay taas nga risgo sa dehydration ang mga gagmayng bata, tigulang ug mga masakiton.

Ang mga simtomas sa dehydration mahimong magkalainlain. Nag depende kini sa gidaghanon sa likido nga nawala sa lawas. Ang kasagaran nga mga sintomas sa dehydration mao ang pagkauhaw, uga ang ba-ba, pagkalipong, labad sa ulo, kakapoy ug dark-color na ang ihi.

Ang National Nutrition Council Region VII nag awhag sa tanang mutambong sa kapistahan ni Sr. Sto. Niño nga kanunay nga moinom og daghang tubig. Mas maayo sab nga mag sul-ob og hayahay nga sanina, palandong ug likay sa init, ug limitahan sa pag inom og mga alcoholic nga ilimnon. Pit Senyor mga kanutrisyon! // DMO II Gabe Henriel P. Sucalit, RND